തൃശ്ശൂര്‍: തൃശ്ശൂര്‍ അതിരൂപത മാതൃവേദി അംഗങ്ങളായ 1200 അമ്മമാരുടെ മെഗാ മാര്‍ഗംകളി ബെസ്റ്റ് ഓഫ് ഇന്ത്യ റിക്കാര്‍ഡ്‌സിലും, യൂണിവേഴ്‌സല്‍ റിക്കാര്‍ഡ് ഫോറത്തിലും ഇടംനേടി. അതിരൂപതയില്‍ മാതൃവേദി സ്ഥാപിതമായതിന്റെ വജ്രജൂബിലി വര്‍ഷ സമാപനാഘോഷത്തോടനുബന്ധിച്ചു തൃശൂര്‍ ലൂര്‍ദ് കത്തീഡ്രല്‍ അങ്കണത്തിലായിരിന്നു മെഗാ മാര്‍ഗംകളി സംഘടിപ്പിച്ചത്. ഇരിങ്ങാലക്കുട രൂപതയിലെ തെക്കന്‍ താണിശേരി ഇടവകാംഗങ്ങളായ 646 അമ്മമാര്‍ അണിനിരന്ന മാര്‍ഗംകളി റിക്കാര്‍ഡാണ് ഇതോടെ ഭേദിക്കപ്പെട്ടത്.

ബെസ്റ്റ് ഓഫ് ഇന്ത്യ റെക്കോഡ്‌സ് അസോസിയേറ്റ് എഡിറ്റര്‍ സ്മിത തോമസിന്റെ നേതൃത്വത്തില്‍ ഡല്‍ഹിയില്‍നിന്നുള്ള ആറംഗ പ്രതിനിധി സംഘമാണ് േെറക്കാഡ് ശ്രമം പരിശോധിക്കാനെത്തിയത്. റെക്കോഡ് ഭേദിച്ചതായി പ്രഖ്യാപിച്ചുകൊണ്ടുള്ള ബെസ്റ്റ് ഓഫ് ഇന്ത്യ റെക്കോഡ്‌സിന്റെ ഫലകം സ്മിത തോമസില്‍നിന്ന് മാതൃവേദി ഡയറക്ടര്‍ ഫാ. ഡെന്നി താണിക്കല്‍ ഏറ്റുവാങ്ങി. നേരത്തെ അതിരൂപത ആര്‍ച്ച്ബിഷപ് മാര്‍ ആന്‍ഡ്രൂസ് താഴത്താണ് പരിപാടി ഉദ്ഘാടനം ചെയ്തത്.