Content | പരിശുദ്ധ ദൈവ മാതാവിനോടുള്ള ജപമാല ഭക്തിയെ പ്രഘോഷിച്ചുകൊണ്ട് ഒക്ടോബർ മാസ രണ്ടാം ശനിയാഴ്ച്ച കൺവെൻഷൻ നാളെ ബർമിങ്ഹാം ബെഥേൽ സെന്ററിൽ നടക്കും. സെഹിയോൻ യുകെയുടെ ആത്മീയ പിതാവ് റവ ഫാ. ഷൈജു നടുവത്താനിയിൽ നയിക്കുന്ന കൺവെൻഷനിൽ ബർമിങ്ഹാം അതിരൂപത ആര്ച്ച് ബിഷപ്പ് ബർണാഡ് ലോങ്ലി മുഖ്യ കാർമ്മികത്വം വഹിക്കും. തലമുറകളുടെ ബാല്യ കൗമാര യൗവ്വനങ്ങളെ യേശുവിലേക്ക് നയിക്കുന്ന കേരളത്തിലെ ക്രിസ്റ്റീൻ മിനിസ്ട്രിയുടെ നേതൃത്വം, പ്രമുഖ വചന പ്രഘോഷകൻ ബ്രദർ സന്തോഷ് ടി കൺവെൻഷനിൽ ശുശ്രൂഷയിൽ പങ്കുചേരും .അഭിഷേകാഗ്നി കാത്തലിക് മിനിസ്ട്രിയുടെ കോഓർഡിനേറ്റർ ബ്രദർ സാജു വർഗീസും വചന വേദിയിലെത്തും. 5 വയസ്സുമുതലുള്ള കുട്ടികൾക്ക് ക്ളാസ്സ് അടിസ്ഥാനത്തിൽ പ്രത്യേക ശുശ്രൂഷയും ,കൂടാതെ കുട്ടികൾക്കും മുതിർന്നവർക്കും ഇംഗ്ലീഷിലോ മലയാളത്തിലോ കുമ്പസാരത്തിനും സ്പിരിച്ച്വൽ ഷെയറിംഗിനും പ്രത്യേക സൗകര്യവും ഉണ്ടായിരിക്കും.
കുട്ടികൾക്കും ടീനേജുകാർക്കുമായി ലിറ്റിൽ ഇവാഞ്ചലിസ്റ്റ് , കിങ്ഡം റെവലേറ്റർ എന്നീ മാഗസിനുകളും കൺവെൻഷനിൽ നൽകിവരുന്നു. സെഹിയോൻ ബുക്ക് മിനിസ്ട്രി "എൽഷദായ്" കൺവെൻഷനിൽ പ്രവർത്തിക്കുന്നു. സെഹിയോൻ മിനിസ്ട്രിയുടെ നേതൃത്വത്തിൽ ലോക സുവിശേഷവത്ക്കരണം ലക്ഷ്യമാക്കി യുകെ യിൽ നിന്നും കത്തിപ്പടർന്ന വിവിധങ്ങളായ ശുശ്രൂഷകൾക്ക് ജീവവായുവായി നിലനിൽക്കുന്ന പ്രതിമാസ രണ്ടാം ശനിയാഴ്ച്ച ബൈബിൾ കൺവെൻഷനും അനുബന്ധ ശുശ്രൂഷകളും യൂറോപ്പിലെ ക്രൈസ്തവ മാഹാത്മ്യത്തിന്റെ പുനഃരുദ്ധാരണത്തിന് സഭയ്ക്ക് താങ്ങായി നിലകൊള്ളുകയാണ്. വിവിധ പ്രദേശങ്ങളിൽനിന്നും കോച്ചുകളും മറ്റ് വാഹനങ്ങളും വിശ്വാസികളുമായി കൺവെൻഷനിലേക്ക് എത്തിച്ചേരും.
വിവിധ ഭാഷാ ദേശക്കാരായ അനേകർ പങ്കെടുത്തുവരുന്നതും മാനവരാശിയെ പ്രത്യാശയിലേക്കും നിത്യ രക്ഷയിലേക്കും നയിക്കുകയെന്ന വർത്തമാന കാലത്തിന്റെ ആവശ്യകതയെയും മുൻനിർത്തി നടക്കുന്ന കൺവെൻഷനിൽ കുട്ടികൾക്കും ടീനേജുകാർക്കും സെഹിയോൻ യുകെ യുടെ കിഡ്സ് ഫോർ കിങ്ഡം , ടീൻസ് ഫോർ കിങ്ഡം ടീമിന്റെ നേതൃത്വത്തിൽ പ്രത്യേക ശുശ്രൂഷയും ക്ലാസ്സുകളും ഉണ്ടായിരിക്കും. കൺവെൻഷനിലുടനീളം കുമ്പസാരത്തിനും സ്പിരിച്വൽ ഷെയറിങിനും സൗകര്യമുണ്ടായിരിക്കുന്നതാണ്.
അത്ഭുതകരമായ വിടുതലും രോഗശാന്തിയും ജീവിത നവീകരണവും ഓരോതവണയും സംഭവിച്ചുകൊണ്ടിരിക്കുന്ന,രോഗപീഡകൾക്കെതിരെ പ്രാർത്ഥനയുടെ കോട്ടകൾ തീർത്തുകൊണ്ട് ,ദേശ ഭാഷാ വ്യത്യാസമില്ലാതെ അനേകർ പങ്കെടുക്കുന്ന, ജപമാല, വി. കുർബാന,വചന പ്രഘോഷണം, ആരാധന, ദിവ്യ കാരുണ്യ പ്രദക്ഷിണം എന്നിവ ഉൾപ്പെടുന്ന രണ്ടാം ശനിയാഴ്ച്ച ബൈബിൾ കൺവെൻഷനിലേക്ക് സെഹിയോൻ മിനിസ്ട്രിയുടെ ആത്മീയ പിതാവ് റവ ഫാ ഷൈജു നടുവത്താനിയും സെഹിയോൻ കുടുംബവും യേശുനാമത്തിൽ ഏവരെയും ക്ഷണിക്കുന്നു. |