| Content | വത്തിക്കാന്‍ സിറ്റി: ഓഷ്യാനയിലെ സീറോ മലങ്കര കത്തോലിക്ക വിശ്വാസികളുടെ അജപാലന കാര്യങ്ങൾക്കായി അപ്പസ്തോലിക് വിസിറ്ററെ നിയമിച്ച് ഫ്രാൻസിസ് പാപ്പ. ബിഷപ്പ് മാർ ആന്റണി സിൽവാനോസിനെയാണ് ഫ്രാൻസിസ് പാപ്പ പുതിയ ഉത്തരവാദിത്വം കൈമാറിയിരിക്കുന്നത്. ഇത് സംബന്ധിച്ച നിയമന ഉത്തരവ് ഇന്നലെ ശനിയാഴ്ച (15/07/23) പുറപ്പെടുവിക്കുകയായിരിന്നു. ഒന്നാം മെത്രാഭിഷേക വാർഷിക ദിനത്തിലാണ് പുതിയ സ്ഥാനലബ്ധിയെന്നത് യാദൃശ്ചികമാണെന്നും അദ്ദേഹം പറഞ്ഞു.
1961 ജൂലൈ 18-ന് ജനിച്ച മാർ ആൻറണി സിൽവാനോസ് കാക്കനാട്ട് 1987ഡിസംബർ 30നു പൗരോഹിത്യം സ്വീകരിച്ചു അഭിഷിക്തനായി. 2022 ജൂലൈ 15-ന് മെത്രാനായി അഭിഷിക്തനാകുകയും ചെയ്തു. ഇന്നലെ (15/07/23) തന്നെ പാപ്പ മലങ്കര കത്തോലിക്ക നിയുക്ത ആർച്ച് ബിഷപ്പും ഖസാഖിസ്ഥാന്‍റെ അപ്പസ്തോലിക് ന്യൂണ്‍ഷോയുമായ ഫാ. ജോര്‍ജ്ജ് പനംതുണ്ടിലിനെ കിർഗിസ്ഥാൻ, താജിക്കിസ്ഥാൻ എന്നിവിടങ്ങളിലെ അപ്പസ്തോലിക് ന്യൂണ്‍ഷോയായും നാമനിർദ്ദേശം ചെയ്തു. ഇക്കഴിഞ്ഞ ജൂൺ പതിനാറിനാണ് അദ്ദേഹത്തെ കസാഖിസ്ഥാൻറെ അപ്പസ്തോലിക് ന്യൂണ്‍ഷോയായി പാപ്പ നിയമിച്ചത്. |
|---|
