| Content | കൊണാക്രി: ജനങ്ങളും നേതാക്കളും ധാർമ്മികയിലേക്കും ദൈവവുമായുള്ള യഥാർത്ഥ ബന്ധത്തിലേക്കും മടങ്ങിവരാതെ രാജ്യത്തിന് ഉയിര്ത്തെഴുന്നേല്പ്പ് ഉണ്ടാകില്ലായെന്ന മുന്നറിയിപ്പുമായി ആരാധനാക്രമ തിരുസംഘത്തിന്റെ മുന് തലവന് കര്ദ്ദിനാള് റോബര്ട്ട് സാറ. മെയ് 9ന് ഗിനിയയിലെ ഹോളി മേരി കത്തീഡ്രലിൽവെച്ച് കൊണാക്രി കത്തോലിക്കാ അതിരൂപതയുടെ ആർച്ച് ബിഷപ്പ് ഫ്രാങ്കോയിസ് സില്ലയെ സ്ഥാനാരോഹണ ശുശ്രൂഷയ്ക്കിടെ പങ്കുവെച്ച സന്ദേശത്തിലാണ് അദ്ദേഹം ഇക്കാര്യം പറഞ്ഞത്. ആഫ്രിക്കന് രാജ്യമായ ഗിനിയയിലെ പ്രതിസന്ധി രാഷ്ട്രീയമോ സാമ്പത്തികമോ ആയ പ്രശ്നങ്ങളിൽ മാത്രമല്ല, ആത്മീയവും ധാർമ്മികവുമായ പരാജയത്തിലും വേരൂന്നിയതാണെന്ന് കർദ്ദിനാൾ സാറ പറഞ്ഞു.
ദൈവത്തെ കൂടാതെ സാമൂഹികവും രാഷ്ട്രീയവുമായ പ്രതിസന്ധികളെ മറികടക്കാൻ കഴിയില്ലെന്ന് കർദ്ദിനാൾ രാജ്യത്തിന് മുന്നറിയിപ്പ് നൽകി. ഗിനിയൻ സമൂഹത്തിലെ ആഴത്തിലുള്ള ധാർമ്മിക തകർച്ചയെ കർദ്ദിനാൾ അപലപിച്ചു. "നമ്മൾ അനുദിനം ജീർണ്ണതയുടെയും, നുണകളുടെയും, അഴിമതിയുടെയും ഒരു അന്തരീക്ഷത്താൽ പൂർണ്ണമായും മലിനമായി ജീവിക്കുകയല്ലേ" - എന്ന ചോദ്യം കര്ദ്ദിനാള് ഉയര്ത്തി. നമ്മുടെ ഗിനിയൻ സമൂഹം പതുക്കെ മരിക്കുന്നത് എങ്ങനെയാണ്? നമ്മുടെ ആന്തരികവും ധാർമ്മികവുമായ ജീവിതത്തിന്റെ തകർച്ച, അഴിമതി, പാഴാക്കൽ, നമ്മുടെ ജീവിതത്തിലും പൊതുനന്മയുടെ നടത്തിപ്പിനെക്കുറിച്ചുള്ള നമ്മുടെ മാനസികാവസ്ഥയിലും ഉണ്ടാകുന്ന ക്രമക്കേട് എന്നിവ കൊണ്ടാണിതെന്നും കർദ്ദിനാൾ ചൂണ്ടിക്കാട്ടി.
ദൈവത്തിന്റെ കൈകളിൽ നമ്മെത്തന്നെ ഏൽപ്പിക്കാൻ ഞങ്ങൾ ആഗ്രഹിക്കുന്നില്ല. സത്യത്തിൽ ദൈവത്തിന് മുന്നിൽ കീഴടങ്ങാൻ നാം ആഗ്രഹിക്കാത്തതിനാൽ നാം നിരന്തരം അവിടുത്തോട് കള്ളം പറയുകയാണെന്നും കര്ദ്ദിനാള് പറഞ്ഞു. വിശ്വാസത്തിന്റെ ആത്മാവിനു മാത്രമേ സമാധാനം കൊണ്ടുവരാൻ കഴിയൂവെന്നും അദ്ദേഹം കൂട്ടിച്ചേര്ത്തു. തിരുസഭയുടെ വിശ്വാസ പാരമ്പര്യങ്ങളെ മുറുകെ പിടിക്കുകയും കാലഘട്ടത്തിന്റെ വെല്ലുവിളികളെ ശക്തമായി തുറന്നുക്കാട്ടുകയും ചെയ്തു മാധ്യമ ശ്രദ്ധ നേടിയ കര്ദ്ദിനാളാണ് റോബര്ട്ട് സാറ. 2014 നവംബര് മുതല് 2021 ഫെബ്രുവരി വരെ ആരാധനാക്രമ തിരുസംഘത്തിന്റെ തലവനായിരുന്ന കര്ദ്ദിനാള് സാറ വിരമിക്കല് 75 വയസ്സ് പൂർത്തിയായതിനെ തുടർന്ന് 2020-ല് രാജി സമര്പ്പിക്കുകയായിരുന്നു.
♦️ {{ 'പ്രവാചകശബ്ദ'ത്തെ സഹായിക്കാമോ? ->http://www.pravachakasabdam.com/index.php/site/news/23220}} ♦️
<iframe src="https://www.pravachakasabdam.com/index.php/site/news/24772" width="100%"height="600" style="border:none;"> </iframe>
|
|---|
