| Content | കൊച്ചി: കെസിബിസി ബൈബിൾ സൊസൈറ്റി നടത്തിയ സംസ്‌ഥാനതല ലോഗോസ് ബൈബിൾ ക്വിസ് ഗ്രാന്റ് ഫിനാലെയിൽ ബീന ജേക്കബ് ലോഗോസ് പ്രതിഭയായി. അഞ്ചു ലക്ഷത്തിഎഴുപതിനായിരം പേരെ പുറകിലാക്കി ഒന്നാം സ്‌ഥാനത്തെത്തിയ ബീന പാലാ രൂപതയിലെ കുന്നോന്നി ഇടവകാംഗമാണ്. ലോഗോസ് പ്രതിഭയ്ക്ക് വിശുദ്ധനാടു സന്ദർശനവും പാലയ്ക്കൽ തോമ്മാ മല്പാൻ കാഷ് അവാർഡുമാണു സമ്മാനം. 2014ലും ബീന ലോഗോസ് പ്രതിഭയായിരുന്നു. ലോഗോസ് ബൈബിൾ ക്വിസിൽ ആറു പ്രായ വിഭാഗങ്ങളിലെ സംസ്‌ഥാനതല ജേതാക്കളെ പങ്കെടുപ്പിച്ചു പാലാരിവട്ടം പിഒസിയിലാണ് ഇന്നലെ ഗ്രാന്റ്് ഫിനാലെ നടന്നത്. ഡി വിഭാഗത്തിലെ ഒന്നാം സ്‌ഥാനക്കാരിയാണ് ബീന ജേക്കബ്.
എ വിഭാഗത്തില്‍ തൃശ്ശൂര്‍ അതിരൂപതാംഗമായ അലീന സോജനും ബി വിഭാഗത്തില്‍ എറണാകുളം–അങ്കമാലി അതിരൂപതാംഗമായ ആൻ ആന്റുവും സി വിഭാഗത്തില്‍ സിസ്റ്റർ കൃപ മരിയയും ഇ വിഭാഗത്തില്‍ ലൈല ജോണും എഫ് വിഭാഗത്തില്‍ ഏലിക്കുട്ടി തോമസും ജേതാക്കളായി. ലോഗോസ് കുടുംബ ക്വിസിൽ ഇരിങ്ങാലക്കുട രൂപതയിലെ ടോണി ബേബിയും കുടുംബവുമാണ് ഒന്നാം സ്ഥാനത്തെത്തിയിരിക്കുന്നത്. ജെ.പി. ഫൗണ്ടേഷൻ നല്കുന്ന 25,000 രൂപയാണ് അവാര്‍ഡ്.
സമാപന സമ്മേളനത്തിൽ തിയോളജി കമ്മീഷൻ ചെയർമാനും മൂവാറ്റുപുഴ രൂപതാധ്യക്ഷനുമായ ഡോ. ഏബ്രഹാം മാർ യൂലിയോസ് വിജയികൾക്കു സമ്മാനങ്ങൾ വിതരണം ചെയ്തു. ലോഗോസ് ബൈബിൾ ക്വിസിന് ആഗോളസഭയിൽ അതുല്യസ്‌ഥാനമുണ്ടെന്നും ജനങ്ങളുടെയിടയിൽ ദൈവവചനം സമീപസ്‌ഥമാക്കുന്നതിൽ ഈ സംരംഭം വലിയ സംഭാവനകൾ ചെയ്യുന്നുണ്ടെന്നും ബിഷപ് ഉദ്ഘാടന പ്രസംഗത്തിൽ അനുസ്മരിച്ചു.
കെസിബിസി ഡെപ്യൂട്ടി സെക്രട്ടറി റവ.ഡോ.വർഗീസ് വള്ളിക്കാട്ട് അധ്യക്ഷതവഹിച്ചു. ലോഗോസ് പ്രതിഭ ബീന ജേക്കബ്, ലോഗോസ് കുടുംബ ക്വിസിൽ ഒന്നാമതെത്തിയ ഫിലോമിന കണ്ണമ്പുഴ, ജെ.പി. ഫൗണ്ടേഷൻ ചെയർമാൻ പി.വി.ജോളി, ജോയി പാലയ്ക്കൽ, കണ്ടിരിക്കൽ ട്രാവൽസ് ഉടമ മാത്യു കണ്ടിരിക്കൽ, ബൈബിൾ സൊസൈറ്റി സെക്രട്ടറി റവ.ഡോ. ജോൺസൺ പുതുശേരി, വൈസ് ചെയർമാൻ ആന്റണി പാലിമറ്റം എന്നിവർ പ്രസംഗിച്ചു. |
|---|
