| Content | അഖ്വാ ഇബോം(നൈജീരിയ): തോക്ക്‌ ധാരികളായ അജ്ഞാത സംഘം നൈജീരിയയിലെ ഇക്കോട്ട്‌ എക്‌പെനി രൂപതയിലെ കത്തോലിക്ക വൈദികനെ തട്ടിക്കൊണ്ട്‌ പോയതായി അഖ്വാ ഇബോം സംസ്ഥാന പോലിസ്‌ കമ്മീഷണര്‍ ഡൊനള്‍ഡ്‌ അവുനഹ്‌ അറിയിച്ചു. പുരോഹിതനെ കണ്ടെത്താനും മോചിപ്പിക്കാനും പ്രത്യേക ദൗത്യ സംഘത്തെ നിയമിച്ചിട്ടുണ്ട്‌.
എസ്സെയ്‌ന്‍ ഉദിമിലെ മെക്‌പടാക്‌ ടോപ്‌ ഫെയ്‌ത്ത്‌ ഇന്റെര്‍ നാഷണല്‍ സ്‌ക്കൂളിലെ അദ്ധ്യാപകനും ഇക്കോട്ട്‌ എടിമിലുള്ള സെന്റെ്‌ മൈക്കിള്‍ ഡി ആര്‍ച്ചെയ്‌ഞ്ചല്‍ ഇടവക വികാരിയുമായ ഫാദര്‍ ഫെലിക്‌സ്‌ അക്‌പാനെയാണ്‌ ഇന്നലെ അജ്ഞാത സംഘം തോക്ക്‌ ചൂണ്ടി തട്ടിക്കൊണ്ട്‌ പോയത്‌. വിദ്യാലയത്തില്‍ നിന്നും തിരിച്ചു പോകുമ്പോള്‍ അബാക്‌-ഉക്കനാഫണ്‍ റോഡില്‍ വെച്ചായിരുന്നു സംഭവം നടന്നത്‌.
വൈദികന്റെ കാര്‍ സമീപത്തുള്ള ഗാരേജില്‍ നിന്നും കണ്ടെടുത്തതായി അന്വേഷണ സംഘം പറയുന്നു. കാര്‍ കൈവശം വെച്ചിരുന്ന രണ്ടു പേരെ കസ്റ്റഡിലെടുത്ത്‌ ചോദ്യം ചെയ്യുന്നതായി നൈജീരിയന്‍ പോലിസ്‌ ഫോഴ്‌സ്‌ വക്താവ്‌ പറഞ്ഞു.
വൈദികനെ തട്ടിക്കൊണ്ടു പോയതുമായി ഭീകരര്‍ക്ക്‌ എന്തെങ്കിലും ബന്ധമുള്ളതായി അറിവായിട്ടില്ല. ഫാദര്‍ ഫെലിക്‌സിന്റെ മോചനത്തിനായി രാജ്യത്തെ ക്രൈസ്‌തവര്‍ പ്രാര്‍ത്ഥനാ നിരതരാണ്‌.
|
|---|
