വത്തിക്കാന്‍ സിറ്റി: സൃഷ്ടിക്കപ്പെട്ട മറ്റു യാഥാർത്ഥ്യങ്ങളെ അതിലംഘിക്കുന്ന ദൈവീക സ്നേഹത്തിന്റെ പദ്ധതിയും ദാനവുമാണ് മനുഷ്യനെന്ന് ലെയോ പാപ്പ. സെപ്റ്റംബർ ഒൻപതാം തീയതി, ലെയോ പതിനാലാമൻ പാപ്പ പൊതുകൂടിക്കാഴ്ച വേളയിൽ നടത്തിയ പ്രഭാഷണത്തിലാണ് പാപ്പ ഇക്കാര്യം പറഞ്ഞത്. ഓരോ വ്യക്തിയും ദൈവത്താൽ ചിന്തിക്കപ്പെടുകയും ആഗ്രഹിക്കപ്പെടുകയും ചെയ്തിരിക്കുന്നത് അവനോടും മറ്റുള്ളവരോടും സൃഷ്ടിയോടും ഉള്ള കൂട്ടായ്മയുടെ ഒരു ചരിത്രത്തിലേക്ക് പ്രവേശിക്കുന്നതിനു വേണ്ടിയാണെന്നും പാപ്പ പറഞ്ഞു.

ഒരു വ്യക്തിയുടെ കഴിവുകളെയോ സമ്പത്തിനെയോ വഹിക്കുന്ന സ്ഥാനത്തെയോ, അവൻ ചെയ്യുന്ന ശരിയായതോ തെറ്റായതോ ആയ തിരഞ്ഞെടുപ്പുകളെയോ ആശ്രയിച്ചല്ല അവന്റെ മഹത്വം നിലകൊള്ളുന്നത്. മറിച്ച്, അത് അതിനു മുമ്പേ നിലനിൽക്കുന്നതും അതിനെ അതിലംഘിക്കുന്നതുമായ ഒരു ദാനമാണ്; ഒരിക്കലും അവസാനിക്കാത്ത തന്റെ സ്നേഹത്തിന്റെ പ്രകടനമായി ദൈവം നൽകിയ ദാനം. അതിനാൽ, മനുഷ്യന്റെ അനന്തമായ മഹത്വം, ദൈവത്തിന്റെ പ്രതിച്ഛായയിൽ സൃഷ്ടിക്കപ്പെട്ട, തന്റെ സ്രഷ്ടാവിനെ അറിയാനും സ്നേഹിക്കാനും കഴിവുള്ള ഒരു സൃഷ്ടിയെന്ന അവന്റെ സ്വത്വത്തിൽ വേരൂന്നിയിരിക്കുകയാണെന്ന് പാപ്പ ചൂണ്ടിക്കാട്ടി.

സൃഷ്ടിക്കപ്പെട്ട മറ്റു യാഥാർത്ഥ്യങ്ങളെ അതിലംഘിക്കുന്ന സ്നേഹത്തിന്റെ പദ്ധതിയും ദാനവുമാണ് മനുഷ്യൻ. ആ സൃഷ്ടികൾ ദൈവത്തിന്റെ മഹത്വത്തിനായി അവയെ പരിപാലിക്കാനും നിയന്ത്രിക്കാനും ഉപയോഗിക്കാനും മനുഷ്യന്റെ ഉത്തരവാദിത്വത്തിൽ ഏൽപ്പിക്കപ്പെട്ടവയാണ്. വ്യക്തി എന്നത് എപ്പോഴും ദൈവത്തോടും മറ്റുള്ളവരോടുമുള്ള ബന്ധത്തെയും കൂട്ടായ്മയെയും പങ്കാളിത്തത്തെയും സൂചിപ്പിക്കുന്നു.

അതായത്, പിതാവായ ദൈവവുമായുള്ള പുത്രബന്ധവും ക്രിസ്തുവുമായും എല്ലാ മനുഷ്യരുമായുമുള്ള സാഹോദര്യബന്ധവുമാണിത്. സ്വയംകേന്ദ്രിതമായ അടച്ചുപൂട്ടലുകളെ അത് ഒഴിവാക്കുന്നു. വ്യക്തിയായിരിക്കുക എന്നതിന്റെ അർത്ഥം, സ്വയം പങ്കുവെക്കേണ്ട ഒരു ദാനമായി സ്വയം തിരിച്ചറിയുകയും, സ്വീകരിക്കുന്നതിലും പരസ്പരതയിലും സേവനത്തിലും വളരുകയും പക്വത പ്രാപിക്കുകയും ചെയ്യുക എന്നതുമാണെന്നും പാപ്പ പറഞ്ഞു.

♦️ 'പ്രവാചകശബ്‌ദ'ത്തെ സഹായിക്കാമോ? ♦️