തിരുവനന്തപുരം: അപ്പസ്തോലികപാരമ്പര്യത്തിലൂന്നിയ മലങ്കരസഭ നൂറ്റാണ്ടുകളായി, വിദ്യാഭ്യാസ, ആധ്യാത്മിക, ശുശ്രൂഷാമേഖലകളിൽ ചെയ്യുന്ന സേവനങ്ങളെ അഭിനന്ദിച്ച് വിദേശ രാജ്യങ്ങളുമായും അന്താരാഷ്ട്ര സംഘടനകളുമായുമുള്ള ബന്ധങ്ങൾക്കായുള്ള വത്തിക്കാൻ രാഷ്ട്രത്തിന്റെ സെക്രട്ടറി ആർച്ച് ബിഷപ്പ് പോൾ റിച്ചാർഡ് ഗല്ലാഘർ. തിരുവനന്തപുരം സെന്റ് മേരീസ് മലങ്കര മേജർ സെമിനാരിയിൽ കഴിഞ്ഞ ദിവസം മലങ്കര ദൈവശാസ്ത്ര ഇൻസ്റ്റിറ്റ്യൂട്ടിന് തറക്കല്ലിട്ട അവസരത്തിൽ നടത്തിയ പ്രഭാഷണമദ്ധ്യേയാണ്, ഈ സഭ നാളിതുവരെ ചെയ്തുപോന്നതും ഇനിയും തുടരേണ്ടതുമായ ശുശ്രൂഷകളുടെ പ്രാധാന്യം വത്തിക്കാൻ നയതന്ത്രജ്ഞൻ കൂടിയായ ആർച്ച് ബിഷപ്പ് ഗല്ലാഘർ അനുസ്മരിച്ചത്.

പ്രാർത്ഥനയിലൂടെയും സ്ഥിരോത്സാഹത്തിലൂടെയും ത്യാഗപ്രവർത്തങ്ങളിലൂടെയും നിങ്ങളുടെ പൂർവ്വികർ അനേകരുടെ ജീവിതത്തെയും സമൂഹങ്ങളെയും രൂപപ്പെടുത്തുന്ന ഇതുപോലെയുള്ള സ്ഥാപനങ്ങൾക്ക് ജന്മം നൽകിയിട്ടുണ്ടെന്ന് അദ്ദേഹം അനുസ്‌മരിച്ചു. പൂർവ്വികർ അവശേഷിപ്പിച്ചുപോയ നല്ല കാര്യങ്ങളും സ്ഥാപനങ്ങളും ഏറ്റെടുക്കുക മാത്രമല്ല, അവരെപ്പോലെ ശുശ്രൂഷ തുടരുക കൂടി വേണം. മലങ്കര ദൈവശാസ്ത്ര ഇൻസ്റ്റിറ്റ്യൂട്ട് ഈ അർത്ഥത്തിൽ വരും തലമുറകളോടുള്ള സഭയുടെ ഉത്തരവാദിത്വത്തിന്റെ പ്രകടമായ ഒരു പ്രഖ്യാപനമാണ്.

ഈ സ്ഥാപനം, വിശ്വാസവും ബുദ്ധിയും ഒരുമയോടെ പരിപോഷിപ്പിക്കപ്പെടുന്ന ഒരിടമായിരിക്കും. ആഴമേറിയ വിചിന്തനങ്ങൾക്കും പഠനങ്ങൾക്കും, ആധ്യാത്മികവളർച്ചയ്ക്കുമുള്ള ഒരു സങ്കേതമായിരിക്കും. ക്രിസ്തുവിന്റെ പ്രകാശം പരത്തുന്ന പ്രത്യാശയുടെ ഒരു ദീപസ്തംഭമായിരിക്കും ഈ സ്ഥാപനം. വിവിധ പശ്ചാത്തലങ്ങളിൽനിന്നെത്തുന്ന എല്ലാവർക്കും സ്വാഗതമരുളുന്ന ഒരു ഇടമായിരിക്കണം ഇത്. പാർശ്വവത്കരിക്കപ്പെട്ടവർക്കും തങ്ങളുടേതായ ഇടം കണ്ടെത്താൻ സാധിക്കുന്നതും, നീതിയും കരുണയും ഒരുമിച്ച് വാഴുന്നതും, ദൈവം തങ്ങൾക്ക് നൽകിയ കഴിവുകളെ വളർത്തിയെടുക്കാൻ ഏവർക്കും സാധിക്കുന്നതുമായ ഒരിടമായിരിക്കണം ഈ സ്ഥാപനമെന്ന് അദ്ദേഹം കൂട്ടിച്ചേർത്തു.