കൊച്ചി: നോട്ടു പിൻവലിക്കലിലൂടെ സാധാരണക്കാർ നേരിടുന്ന പ്രശ്നങ്ങൾക്കു പരിഹാരമുണ്ടാക്കാൻ സർക്കാർ അടിയന്തരനടപടി സ്വീകരിക്കണമെന്ന്‍ കേരള കത്തോലിക്കാ മെത്രാൻ സമിതി. നോട്ടു പിൻവലിക്കൽ ലക്ഷ്യം വയ്ക്കുന്ന സദ്ഫലങ്ങൾ ഉറപ്പുവരുത്താൻ സർക്കാർ സംവിധാനങ്ങൾ കാര്യക്ഷമമായും അഴിമതിരഹിതമായും പ്രവർത്തിക്കുന്നുവെന്ന് ഉറപ്പാക്കണമെന്നും പിഒസിയിൽ സമാപിച്ച ശൈത്യകാല കെസിബിസി സമ്മേളനം ആഹ്വാനംചെയ്തു.

ഗ്രാമപ്രദേശങ്ങളിൽനിന്നും പിന്നോക്ക വിഭാഗങ്ങളിൽനിന്നും സമാഹരിക്കുന്ന പണം നഗരകേന്ദ്രീകൃതമായ വമ്പൻ വ്യവസായങ്ങളിലും പദ്ധതികളിലും മാത്രം മുതൽ മുടക്കുന്നത്, ഗ്രാമങ്ങളും നഗരവും തമ്മിലുള്ള വിടവ് കൂട്ടും. ഇതു നഗരങ്ങൾക്കു വേണ്ടി ഗ്രാമങ്ങൾ ചൂഷണം ചെയ്യപ്പെടുന്ന സാഹചര്യമുണ്ടാക്കും. കൃഷിക്കാരുടെയും ചെറുകിട കച്ചവടക്കാരുടെയും തീരദേശജനതയുടെയും ക്ഷേമവും വികസനവും ഉറപ്പുവരുത്തുന്ന നടപടികൾ സർക്കാരിന്റെ ഭാഗത്തുനിന്നുണ്ടാകണം. ഗ്രാമങ്ങളുടെ വികസനത്തിൽ സുപ്രധാന പങ്ക് വഹിക്കുന്ന സഹകരണ മേഖലയിലെ പ്രതിസന്ധികൾ പരിഹരിക്കാനും സത്വര നടപടികളുണ്ടാകണം.

സ്ത്രീ– പുരുഷ വ്യക്‌തിത്വങ്ങളുടെ തുല്യമഹത്വവും പാരസ്പര്യവും മാനിക്കപ്പെടണം. സഭയുടെ വിശ്വാസ, ധാർമിക പരിശീലനത്തിലും വിദ്യാഭ്യാസ പ്രവർത്തനങ്ങളിലും ആരോഗ്യകരമായ സ്ത്രീ–പുരുഷബന്ധത്തിനു പ്രാധാന്യവും പരിശീലനവും നൽകണം. സ്നേഹത്തിന്റെ പക്വതയിലേക്കു വളരാനും ഭാവിജീവിതം ക്രമപ്പെടുത്താനും യുവതലമുറയെ സഹായിക്കുന്നതിൽ ശ്രദ്ധ വേണം. കെസിബിസി സമ്മേളനം ആവശ്യപ്പെട്ടു.

ഓരോ കുടുംബത്തിന്റെയും സാഹചര്യം തിരിച്ചറിഞ്ഞു കാരുണ്യത്തോടും സഹാനുഭൂതിയോടുംകൂടി അവരെ അനുധാവനം ചെയ്യാൻ സഭാശുശ്രൂഷകർക്കു കഴിയണം. കുടുംബങ്ങളുടെ ശുശ്രൂഷകളിൽ പരിശീലനം ലഭിച്ച അല്മായരുടെ സേവനം പ്രയോജനപ്പെടുത്തണം. സ്ത്രീകളോടും കുട്ടികളോടും സമൂഹത്തിൽ വർധിച്ചുവരുന്ന അതിക്രമങ്ങളിൽ സമ്മേളനം ആശങ്ക രേഖപ്പെടുത്തി.