India - 2025
സഭൈക്യത്തിനായുള്ള പൊന്തിഫിക്കല്‍ കൗൺസിൽ അംഗമായി മാര്‍ ജോര്‍ജ്ജ് ആലഞ്ചേരിയെ തിരെഞ്ഞെടുത്തു.
സ്വന്തം ലേഖകന്‍ 13-04-2016 - Wednesday
വത്തിക്കാന്‍: ക്രൈസ്തവ സഭകളുടെ ഐക്യത്തിനായുള്ള പൊന്തിഫിക്കല്‍ കൗൺസിൽ (PCPCU) അംഗമായി സീറോ മലബാര്‍ ആര്‍ച്ച് ബിഷപ്പ് കര്‍ദിനാള്‍ മാര്‍ ജോര്‍ജ്ജ് ആലഞ്ചേരിയെ ഫ്രാന്‍സിസ് മാര്‍പാപ്പ നിയമിച്ചു. അഞ്ചു വര്‍ഷത്തേക്കാണ് നിയമനം. നിലവില്‍ ആഗോള കത്തോലിക്ക സഭയുടെ വിശ്വാസ തിരുസംഘത്തിലും പൌരസ്ത്യ സഭകള്‍ക്കായുള്ള തിരുസംഘത്തിലും വിശ്വാസ പരിശീലനത്തിനായുള്ള രാജ്യാന്തര കൌണ്‍സിലും മാര്‍ ആലേഞ്ചേരി അംഗമാണ്.
ലോകമെങ്ങുമുള്ള ക്രൈസ്തവ സഭകള്‍ തമ്മില്‍ ശക്തിപ്പെടുത്തുന്നതിനു രണ്ടാം വത്തിക്കാന്‍ കൌണ്സിലിന്റെ ദര്‍ശനത്തില്‍ ജോണ്‍ ഇരുപത്തി മൂന്നാമന്‍ മാര്‍പാപ്പയാണ് സെക്രട്ടറിയേറ്റ് ഫോര്‍ പ്രമോട്ടിങ് ക്രിസ്റ്റ്യന്‍ യൂണിറ്റി രൂപീകരിച്ചത്. ജോണ്‍ പോള്‍ രണ്ടാമന്‍ മാര്‍പാപ്പ ഇതിനെ ക്രിസ്തീയ ഐക്യത്തിനായുള്ള പൊന്തിഫിക്കല്‍ കൌണ്‍സിലാക്കി വിപുലീകരിച്ചു. കത്തോലിക്ക സഭയ്ക്കുള്ളിലും മറ്റ് ക്രൈസ്തവ സഭകള്‍ തമ്മിലും ഐക്യചിന്തകള്‍ പ്രോത്സാഹിപ്പിക്കുകയും സംവാദ വേദികള്‍ ശക്തമാക്കുകയും ചെയ്യുകയാണ് ലക്ഷ്യം. കര്‍ദിനാള്‍ ഡോ.കുര്‍ട്ട് കോഹ് ആണ് കൌണ്സിലിന്റെ പ്രസിഡന്‍റ്.
