റോമിലെ പൊന്തിഫിക്കൽ ഗ്രിഗോറിയൻ സർവകലാശാലയിൽനിന്ന് വിശുദ്ധഗ്രന്ഥശാസ്ത്രത്തിൽ ലൈസൻഷ്യേറ്റ് നേടിയ റവ. ഡോ. സാജു പിണക്കാട്ട് 2008-ലാണ് യു.കെ.യിലെത്തിയത്. അജപാലന ശുശ്രൂഷകൾക്കൊപ്പം ലണ്ടനിലെ ഹെയ്ത്രോപ് കോളേജിൽനിന്ന് ബൈബിൾ പഠനത്തിൽ ഡോക്ടറേറ്റും നേടി. 2014 മുതൽ 2021 വരെ വോണർഷിലെ സെന്റ് ജോൺസ് സെമിനാരിയിൽ വിശുദ്ധഗ്രന്ഥശാസ്ത്ര അധ്യാപകനായി സേവനമനുഷ്ഠിച്ചു.
യു.കെ.യിലെ സീറോ മലബാർ വിശ്വാസികളുടെ അജപാലന, ആത്മീയ, മതബോധന ശുശ്രൂഷകളിലും അദ്ദേഹം ശ്രദ്ധേയമായ സംഭാവനകൾ നൽകിയിട്ടുണ്ട്. ഗ്രേറ്റ് ബ്രിട്ടൻ സീറോ മലബാർ രൂപത സ്ഥാപിതമാകുന്നതിനു മുമ്പുതന്നെ ഈ മേഖലയിലെ ശുശ്രൂഷകളിൽ സജീവമായിരുന്ന അദ്ദേഹം 2018 മുതൽ 2024 വരെ സീറോ മലബാർ മിഷൻ ഡയറക്ടറായും പ്രവർത്തിച്ചു. കപ്പുച്ചിൻ സന്യാസസമൂഹാംഗമായിരുന്ന റവ. ഡോ. സാജു പിണക്കാട്ട് തലശ്ശേരി അതിരൂപതയിലെ കുടിയാൻമല ഫാത്തിമ മാതാ ഇടവകാംഗവും തോമസ് പിണക്കാട്ടിന്റെയും പരേതയായ മേരി അറക്കപ്പറമ്പിലിന്റെയും മകനാണ്.
