ഒരേസമയം ഒന്നുമുതൽ മൂന്നുവരെ കുട്ടികളെ സംരക്ഷിക്കാൻ അവർ തീരുമാനിച്ചു. 1992 മുതൽ ഇവർ 28 കുട്ടികളെ ഇത്തരത്തിൽ സംരക്ഷിച്ചിട്ടുണ്ട്. ഭിന്നശേഷിക്കാരും സങ്കീർണ്ണമായ രോഗാവസ്ഥകൾ ഉള്ളവരുമായ കുരുന്നുകളെയാണ് അവർ ഏറെയും നെഞ്ചോട് ചേർത്തത്. ഇവർ വളർത്തിയ കുട്ടികളിൽ ചിലർ പിന്നീട് മാതാപിതാക്കളുടെ അടുത്തേക്ക് മടങ്ങുകയോ മറ്റ് കുടുംബങ്ങളാൽ ദത്തെടുക്കപ്പെടുകയോ ചെയ്തു. പലരും ഇന്നും സിസ്റ്റർമാരുമായി ആഴമേറിയ ബന്ധം കാത്തുസൂക്ഷിക്കുന്നു.
തലമുറകളായി നിശ്ശബ്ദമായി സേവനം ചെയ്തുവന്ന അനേകം സന്യാസിനിമാരുടെ മാതൃകയാണ് സ്വീകരിച്ചതെന്നും അഗാധമായ കൃതജ്ഞതയോടെ പുരസ്കാരം സ്വീകരിക്കുകയാണെന്നും സിസ്റ്റർ മിഷേൽ പ്രതികരിച്ചു. ദൈവപരിപാലനയിൽ ആശ്രയിക്കാനും പങ്കുവെക്കലിലൂടെ ദൈവാനുഗ്രഹങ്ങൾ ഇരട്ടിയാക്കാനുമാണ് തങ്ങളുടെ സന്യാസ ചൈതന്യം പഠിപ്പിക്കുന്നതെന്നും അവർ കൂട്ടിച്ചേർത്തു. നിലവിൽ സിസ്റ്റേഴ്സ് ഓഫ് ഡിവൈൻ പ്രൊവിഡൻസ് സന്യാസിനീ സമൂഹത്തിന്റെ മാരി ഡി ലാ റോഷ് പ്രൊവിൻഷ്യൽ ഡയറക്ടറായും, ലാ റോഷ് സർവകലാശാലാ ബോർഡ് ഓഫ് ട്രസ്റ്റീസ് വൈസ് ചെയർപേഴ്സണായും സേവനം അനുഷ്ഠിച്ചുവരികയാണ് മിഷേൽ ബിസ്ബെക്ക്.
