News

ബോംബുകൾക്ക് ഞങ്ങളുടെ വിശ്വാസത്തെ തകർക്കാനാകില്ല: യുക്രൈനില്‍ സേവനം ചെയ്യുന്ന മലയാളി കന്യാസ്ത്രീ സിസ്റ്റർ ലിജി

പ്രവാചകശബ്ദം 24-08-2026 - Monday

കീവ്: രാജ്യത്ത് തുടരുന്ന യുദ്ധത്തിനിടയിലും തങ്ങളുടെ വിശ്വാസവും സ്വാതന്ത്ര്യത്തിനായുള്ള ആഗ്രഹവും തകർക്കാൻ ബോംബാക്രമണങ്ങൾക്ക് കഴിയില്ലെന്ന് യുക്രൈനില്‍ സേവനം ചെയ്യുന്ന മലയാളി കന്യാസ്ത്രീ സിസ്റ്റര്‍ ലിജി പയ്യപ്പിള്ളി. വത്തിക്കാൻ ന്യൂസിന് നൽകിയ അഭിമുഖത്തിലാണ് സിസ്‌റ്റേഴ്‌സ് ഓഫ് സെയ്ന്റ് ജോസഫ്‌സ് ഓഫ് സെയ്ന്റ് മാര്‍ക്ക് സന്യാസിനി സമൂഹാംഗമായ സിസ്റ്റര്‍ ലിജി രാജ്യത്തിന്റെ നിശ്ചയദാര്‍ഢ്യവും അടിയുറച്ച ക്രൈസ്തവ വിശ്വാസവും പ്രകടിപ്പിച്ചത്. ഇരുപത്തിയൊന്നാം നൂറ്റാണ്ടിൽ രണ്ടാം ലോകമഹായുദ്ധത്തിന് സമാനമായ ഭയാനകമായ ദൃശ്യങ്ങൾക്ക് സാക്ഷ്യം വഹിക്കേണ്ടി വരുമെന്ന് ഒരിക്കലും കരുതിയിരുന്നില്ലെന്ന് സിസ്റ്റർ ലിജി പറഞ്ഞു.

ഒരു കഷ്ണം റൊട്ടി ലഭിക്കാനായി പുലർച്ചെ നാല് മണി മുതൽ ആളുകൾ വരിനിൽക്കുന്നത് ഞാൻ കണ്ടു. 2004-ൽ ഞാൻ യുക്രൈനില്‍ എത്തിയപ്പോൾ, രണ്ടാം ലോകമഹായുദ്ധകാലത്തുണ്ടായ ക്ഷാമത്തെക്കുറിച്ച് വയോധികർ എന്നോട് പറഞ്ഞിരുന്നു. എന്നാൽ ഇരുപത്തിയൊന്നാം നൂറ്റാണ്ടിലും അതേ കാഴ്ച , ഒരു കഷ്ണം റൊട്ടിയും ഒരു ടിൻ ഭക്ഷണവും ലഭിക്കാനായി ആയിരക്കണക്കിന് ആളുകൾ വരിനിൽക്കുന്നത് എന്റെ സ്വന്തം കണ്ണുകൊണ്ട് കാണേണ്ടിവരുമെന്ന് ഞാൻ ഒരിക്കലും കരുതിയിരുന്നില്ല.

ഞാൻ ദുരിതബാധിതരെ ചേർത്തുപിടിച്ചപ്പോൾ പലരും പൊട്ടിക്കരഞ്ഞു. അവരെ സംബന്ധിച്ചിടത്തോളം, ആ സ്നേഹപ്രകടനം പോലും ഒരുതരം മോചനമായിരുന്നു. ഈ കഠിനമായ സമയത്തും ജനങ്ങൾക്ക് ജീവിക്കാനുള്ള ആഗ്രഹവും ദൈവത്തിലുള്ള ഉറച്ച വിശ്വാസവുമാണ് മുന്നോട്ട് പോകാനുള്ള കരുത്ത് നൽകുന്നത്. കഠിനമായ പ്രതിസന്ധിയും കുടിവെള്ളത്തിന്റെ ദൗർലഭ്യവും നിലനിൽക്കുമ്പോഴും, അവിടുത്തെ ജനങ്ങളുടെ മനോഭാവം തന്നെ അത്ഭുതപ്പെടുത്തിയെന്ന് സിസ്റ്റർ ലിജി പറയുന്നു.

പ്രദേശവാസികള്‍ക്ക് പരാതികളോ നിരാശയോ ഉണ്ടാകുമെന്നാണ് ഞാൻ കരുതിയത്; എന്നാൽ അതിനുപകരം, അവർ ദൈവത്തോടുള്ള അഗാധമായ നന്ദി പ്രകടിപ്പിക്കുന്നതാണ് ഞാൻ കേട്ടത്! അവർ പറഞ്ഞു: "പ്രാർത്ഥനയാണ് ഞങ്ങളുടെ കരുത്ത്. നാളെ ഞങ്ങൾ ജീവിച്ചിരിക്കുമോ എന്ന് ഞങ്ങൾക്ക് അറിയില്ല; എങ്കിലും ഉക്രേനിയക്കാരായി ജീവിക്കാനും ഉക്രേനിയക്കാരായിത്തന്നെ മരിക്കാനുമാണ് ഞങ്ങൾ ആഗ്രഹിക്കുന്നത്." സങ്കീർണ്ണ സാഹചര്യത്തിൽ പ്രാർത്ഥന ജനങ്ങൾക്ക് ആശ്വാസവും ധൈര്യവും നൽകുകയാണെന്നും സിസ്റ്റര്‍ ലിജി പറയുന്നു.

കഴിഞ്ഞ രണ്ടു പതിറ്റാണ്ടിലധികമായി യുക്രൈനില്‍ സേവനം ചെയ്യുന്ന സിസ്റ്റര്‍ ലിജി എറണാകുളം നെടുമ്പാശേരി സ്വദേശിനിയാണ്. യുക്രൈന്‍റെ സ്വാതന്ത്ര്യദിനത്തോടനുബന്ധിച്ച് രാജ്യത്തുടനീളവും ലോകമെമ്പാടുമുള്ള ക്രൈസ്തവ സമൂഹങ്ങളിലും യുക്രൈനില്‍ സമാധാനം സംജാതമാകുന്നതായി പ്രത്യേക പ്രാർത്ഥനകളും ദിവ്യബലിയും സംഘടിപ്പിച്ചിരിന്നു. ഫ്രാന്‍സിസ് പാപ്പ തിരുസഭയെ നയിച്ച കാലയളവിലും ഇപ്പോള്‍ ലെയോ പാപ്പയുടെ കാലത്തും വത്തിക്കാന്റെ നേതൃത്വത്തില്‍ നിരവധി തവണ യുക്രൈനില്‍ സഹായമെത്തിച്ചിട്ടുണ്ട്.

♦️ 'പ്രവാചകശബ്‌ദ'ത്തെ സഹായിക്കാമോ? ♦️

'പ്രവാചകശബ്‌ദ'ത്തിന്റെ ശുശ്രൂഷകളെ സഹായിക്കാമോ?

നിങ്ങൾ നൽകുന്ന സഹായം ദൈവരാജ്യ മഹത്വത്തിനായുള്ള 'പ്രവാചകശബ്ദ'ത്തിന്റെ ശുശ്രൂഷകൾ തുടരാൻ ഞങ്ങളെ സഹായിക്കുന്നു.

സംഭാവന നൽകുക / Donate

Related Articles »